Unioni i gazetarëve i ka dërguar një letërankese
kreut të KQZ-së, Lefterie Lleshi dhe Avokatit të Popullit, Igli Totozani ku i kërkojnë
anulimin e vendimin për transmetimin e kasetave bruto nga forcat politike. Më
posshtë, letra e plotë:
E nderuar zonja Kryetare,
Unioni i Gazetarëve Shqiptarë , organizata më
e madhe e gazetarëve profesionistë të vendit, prej ditësh ka ndërmarrë një
inkursion denoncimesh publike dhe institucionale ndaj vendimit të Komisionit
Qendror të Zgjedhjeve të datës 03.06.2013: “Për pasqyrimin e fushatës zgjedhore
në radiotelevizionin privat bazuar në materialet e vëna në dispozicion nga
subjektet zgjedhore”. Në këtë vendim ndër të tjera në pikat a dhe c
specifikohet si më poshtë: a)Informacionet mbi aktivitet e fushatës zgjedhore,
që përgatiten dhe transmetohen në edicionet informative bazuar në materiale të
vëna në dispozicion nga subjketet zgjedhore, duhet të identifikohen qartë.
Ndërsa në pikën c shtohet:”Ne rast se operatori refuzon të transmetojë
materialet e përgatitura nga vet subjekti zgjedhor, operatori njofton menjëherë
dhe i’a vë në dispozicion menjëherë Bordit të Monitorimit te Medias këto
materiale për ti verifikuar. Bordi i Monitorimit të Medias vlerëson materialin
dhe i propozon raportin përkates për miratim KQZ-së brenda 12 orëve. BMM nëse
vlerson se materiali plotëson kriteret teknike i propozon KQZ-së transmetimin e
materialit nga operatori, në përputhje me rregullat e Kodit Zgjedhor dhe akteve
të KQZ-së. BMM nëse vlerëson se ky material nuk i plotëson kriteret teknike i
propozon KQZ-së kthimin e materialit subjektit zgjedhor. KQZ merr vendim brenda
24 orëve në lidhje me propozimin e BMM. BMM monitoron zbatimin e vendimit të
KQZ-së.”
Zonja kryetare e KQZ-së,
Këto dy pika të këtij vendimi të firmosur prej
jush, shprehin një akt që cënon drejtpërdrejtë një nen të Kushtetutës për të
drejtën për informim dhe për t’u informuar.
Unioni i Gazetarëve Shqiptarë e denoncon këtë
vendim si më absurdin dhe si një dokument zyrtar i cili u heq atributin mediave
dhe reporterëve për të raportuar drejtëpërsëdrejti nga mjedisi dhe realiteti
elektoral, duke i shndërruar partitë politike edhe në institucione të prodhimit
të lajmit dhe servirjes së imponuar mediave profesioniste të vendit. Ky vendim
i cili, sipas informimit tonë para se të kalohej në KQZ, është miratuar vetëm
nga katër prej shtatë anëtarëve të Bordit të Monitorimit të Mediave pranë
KQZ-së, konsiderohet prej nesh një precedent i rrezikshëm dhe fyes për gjithë
komunitetin e gazetarëve profesionistë të Shqipërisë.
Me autoritetin tuaj ligjor, ne kërkojmë që të
ndërhyni për t’u ndalur fuqia vepruese e këtij vendimi pasi ai bie ndesh me
dispozita të Kushtetutës së Shqipërisë.
Unioni i Gazetarëve Shqiptarë shpreh besimin
se ju si drejtuese e institucionit kryesor të zgjedhjeve do të reagoni pa humbur
kohë dhe do të ndërmerrni të gjitha veprimet ligjore, që ky vendim të mos ketë
fuqi vepruese përgjatë ditëve të mbetura të fushatës zgjedhore të vitit 2013.
Ne jemi të bindur se lënia në fuqi e këtij vendimi, do të shkaktojë një reagim
të organizatave ndërkombëtare që merren me mbrojtjen dhe vlerësimin e lirisë së
shtypit dhe të mediave në vend si dhe në indekset e tregueshmërisë së lirisë
dhe pavarësisë së mediave, vendi ynë rrezikon të pësojë rënie tronditëse.
Zoti
Avokat i Popullit,
Unioni i Gazetarëve Shqiptarë e konsideron
betejën për refuzimin dhe anulimin e këtij vendimi të KQZ-së si një cështje
themelore të lirisë dhe integritetit të mediave dhe gazetarëve në vend. Për
këtë shkak përpjekjet dhe reagimet tona nuk do të rreshtin, pasi ajo lidhet me
kauzën e lirisë dhe së drejtës sonë profesionale.
Me besimin dhe urimet më të mira për ju
Aleksandër Çipa
Kryetar i Unionit të Gazetarëve Shqiptarë
No comments:
Post a Comment