Kolegji rrëzon Lleshin. Opozita fiton 1 betejë

Opozita fitoi betejën e parë ligjore përballë KQZ-së, në Kolegjin Zgjedhor. Socialistët kishin ankimuar një vendim të Komisionit Qendror, që caktonte 3 vend-votime në një ambient privat dhe në pronësi të aktivistëve të PD-se në Tiranë. Trupa e Kolegjit pasi dëgjoi argumentat e palëve, i dha të drejtë PS-së që qendrat e votimit të zhvendoseshin në një shkollë publike. KQZ mbrojti qëndrimin se kishte zgjedhur ambientin privat për tu ardhur në ndihmë më afër votuesve, pasi ishte më afër njësisë. Por mbrojtësi ligjor i PS Eno Bushi tha se largësia e shkollës, nuk ishte më shumë se 270 metra larg. Përfaqësuesi i PD, si palë e interesuar Ivi Kaso u shpreh në seancë se socialistët nuk provuan se pronari i ambjentit të miratuar nga KQZ të kishte lidhje me kandidatët e Partisë Demokratike, por të majtët thanë se ai ishte drejtues i një nënseksioni të partisë në pushtet.  Kjo ishte përballja e parë në Kolegj për këtë proces zgjedhor, por për shkak se KQZ-së i mungon anëtarësia e plotë, shumë vendime që kërkojnë shumicë të cilësuar do të zgjidhen nga kjo trupë gjykuese. Kolegji Zgjedhor pranon padinë e Partisë Socialiste, lidhur me 3 qendrat e votimit të vendosura në njësinë numër 4, në pronësi të familjes Kuka. Partia Socialiste pretendonte në kërkesën e saj se familja Kuka ka lidhje me Partinë Demokratike, duke kërkuar që qendrat e votimit të zhvendoseshin në ambiente publike. Kolegji Zgjedhor nën drejtimin e Valbon Çekrezit, pranoi kërkesën e PS, duke rrëzuar vendimin e KQZ me nr, 458 të datës 21 Maj 2013, duke zhvendosur në këtë mënyrë 3 qendrat e votimit nga ambiente private në ambientet publik, saktësisht në shkollën “Pal Ëngjëlli”.