Eliot Engel : Zgjedhjet , shansi i fundit!

"Më 23 qershor Shqipëria duhet të dëshmojë se e meriton të jetë pjesë e Bashkimit Europian. Zgjedhjet të mos kenë manipulime, të pranohen nga të gjithë palët dhe politika t'i japë fund bojkotit parlamentar se të së shkuarës". Kongresmeni amerikan Eliot Engel bën këto komente duke iu referuar situatës elektorale në Shqipëri. Per ngërçin në KQZ, ligjvënësi amerikan thotë se shpreson në zgjidhjen e mosmarrëveshjeve politike ndërsa këshillon kapërcimin e gabimeve në proceset e mëparshme elektorale.

"Nuk mund t'i kemi konfrontimet që patëm para disa vjetësh, nuk mund të kemi një situatë në të cilën një parti politike nuk merr pjesë në kuvend, cilado parti politike qoftë ajo. Kushdo që zgjidhet duhet të marrë pjesë në Kuvend", shprehet Engel në një intervistë për Europa e Lirë. "Bashkimi Evropian do t'i vëzhgojë këto zgjedhje dhe do të vendos nëse Shqipëria është kandidate për anëtarësim në BE, bazuar në masë të madhe në mbarëvajtjen e këtyre zgjedhjeve".

Në këtë mënyrë Engel i konsideron zgjedhjet parlamentare si jashtëzakonisht të rëndësishme për statusin e vendit kandidat në BE dhe thotë se mbarë bota i ka sytë nga këto zgjedhje të cilat do të zënë një pjesë të madhe në gjykimin e BE-së për kandidaturën e Shqipërisë.