Berisha: Do heqim vizat me SHBA. Por Kongresi nuk e miratoi

Kryeministri Sali Berisha ka lëshuar një premtim shumë të fortë gjatë një mitingu në Durrës. Në fjalën e tij, kryeministri premtoi se do të hiqen vizat edhe me Shtetet e Bashkuara të Amerikës.“Asnjëherë nuk duhet të merremi shumë me histori e duhet të shohim vetëm para. Por prapë me histori duhet të merremi vetëm aq sa na duhet për të  parë më mirë përpara. Ju bëj thirrje që për një moment të mendoni: Si ka mundësi 22 vjet në radhë, të gjitha ngjarjet e mëdha të integrimit,  anëtarësimi në KE, në NATO, marrëveshja e Stabilizim – Asociimit, liberalizimi i vizave, propozimi i statusit të vendit kandidat lidhen vetëm me emrin e PD-së?! Jo! Ne nuk kemi qenë 22 vjet në pushtet, por kemi qenë edhe në opozitë e kemi qenë në mbështetje të integrimit.

Për çdo qytetar, asgjë s’ka më jetike se integrimi ynë në Europë”, tha Kryeministri. Deklarata u bë menjëherë pas lajmit të transmetuar në Top Channel se qeveria ka akorduar nga buxheti i shtetit edhe 400 mijë dollarë për kompaninë lobuese Podesta. Por çështja e heqjes së vizave nga SHBA është një çështje shumë e e komplikuar dhe nuk bëhet me deklarata.  Në shkurt të këtij viti, Kongresi amerikan diskutoi për projekt-ligjin për liberalizimin e vizave me disa shtete, kryesisht europiane dhe aletatë të Shteteve të Bahkuara të Amerikës. Sipas draftit Shqipëria nuk është shtet kandidat, të cilës mund t’i hiqen vizat për qytetarët e saj, që të udhëtojnë më lehtë në SHBA. Gjithashtu edhe shteti ynë fqinj, Maqedonia. Nga vendet e rajonit Greqia është e fundit që ka fituar liberalizimin e vizave për në SHBA në vitin 2010, kurse janë kandidatë aktualë për liberalizim edhe Polonia, Rumania, Bullgaria, Kroacia, Qipro dhe Turqia. Nga shtetet tjera në botë në këtë program janë futur edhe Australia, Japonia, Korea e Jugut dhe Tajvani. Në mes të shteteve kandidate janë edhe: Izraeli, Brazili, Argjentina, Kili, Paraguaji dhe Uruguaji, kurse për Kanadanë funksionon regjimi special pa viza.