Nga 14 mandate në Elbasan, opozita merr 8 mandate, ndërsa mazhoranca 6 mandate Sondazhi: E majta ruan fitoren me 6 për qind

E majta vijon që të ruajë avantazhin me koalicionin e djathtë, duke fituar gjithnjë e më tepër terren. Sipas sondazhit të katërt dhe i fundit, i zhvilluar për zgjedhjet e 23 qershorit nga kompania e njohur italiane “IPR Marketing”, prezantuar mbrëmjen e sotme në “Ora News”, rezulton se nëse zgjedhjet do të zhvilloheshin më 17 qershor, e majta arrin që të sigurojë 51 për qind të votave, kundrejt 45 për qind të votave që arrin të sigurojë koalicioni i djathtë. Ndryshe nga sondazhi i mëparshëm i dy javëve më parë, në këtë sondazh është ngushtuar diferenca mes dy kampeve, pasi më përpara, koalicioni i majtë ishte tetë pikë në avantazh, ndërsa tani është gjashtë pikë përpara. Sa u përket votave si parti, nga e majta, PS-ja ka 48.1 për qind të votave, LSI-ja ka 5.7 për qind. Kurse partitë e djathta, konkretisht PD-ja ka 39 për qind, PDIU-ja ka 1.2 për qind, PR-ja 1.1 për qind. FRD-ja merr 2.5 për qind, duke njohur një rënie të lehtë.

Qarku i Elbasanit

Edhe pse me shumë bujë, kreu i së djathtës, Sali Berisha, përuroi tunelin e Elbasanit, e majta rezulton të jetë fituese në Elbasan. Në sondazhin e publikuar mbrëmjen e djeshme, sipas përllogaritjeve të ekspertëve të “IPR Marketing”, rezulton se nëse zgjedhjet do të zhvilloheshin sot, koalicioni i majtë do të merrte 8 mandate, ndërsa ai i Berishës 6 mandate në Qarkun e Elbasanit. Ndërkohë, LSI-ja arrin të marrë një mandat brenda koalicionit të majtë. Konkretisht, sa i përket përqindjes së shpërndarjes së votave, koalicioni i majtë “Aleanca për Shqipërinë Europiane” do të merrte 52 për qind të votave, ndërsa koalicioni i djathtë “Aleanca për Punësim, Mirëqenie dhe Integrim” do të merrte 45 për qind të votave. Sa u përket votave si parti, dy partitë e mëdha vazhdojnë të përballen kokë më kokë mes tyre, me një diferencë të vogël në favor të PS-së që ka 43% të votave, kundrejt 40% të PD-së, e ndjekur nga LSI-ja me 5,5%, ndërsa partitë e tjera nuk e kalojnë pragun e marrjes së një mandati. FRD-ja e Bamir Topit me 2 për qind të votave nuk merr asnjë mandat. Po ashtu, edhe AK-ja e Kreshnik Spahiut, e cila merr 0.5 për qind, nuk merr dot asnjë mandat në Qarkun e Elbasanit.

Të pavendosurit

Ndërsa na ndajnë vetëm 6 ditë nga zgjedhjet, gjetja e parë e sondazhit ka të bëjë me elektoratin e pavendosur, nga ku rezulton se 12% e të anketuarve janë akoma të papozicionuar, me përqindje kryesuese nga elektorati i femrave. Të klasifikuar në bazë të moshës rezulton se masa dërrmuese e 12% të pavendosurve kryesohet nga të rinjtë. Ndërsa numri i personave që kanë refuzuar të përgjigjen në sondazh janë 7-8 për qind i numrit të përgjithshëm të të intervistuarve, të cilët gjatë pyetjes kishin tri mundësi zgjedhjeje. Nga të pavendosurit, të pyetur për votën e tyre në zgjedhjet e 2009-s, rezulton se pjesa më e madhe, 19.1 për qind, kanë votuar për PD-në, në krahasim me ata që kanë votuar PS-në, që janë vetëm 10.6 për qind.

Të intervistuarit

Sa i përket sondazhit, numri i të intervistuarve, ndryshe nga radhët e tjera, ishte i ndryshëm nga ata që u intervistuan në sondazhin e realizuar në rang kombëtar me sondazhin lokal, i zhvilluar vetëm për Qarkun e Elbasanit. Kështu, në rang kombëtar u intervistuan gjithsej një kampion prej 1501 personash, ndërsa në Elbasan u intervistuan gjithsej 1000 persona. Sa i përket saktësisë së përllogaritjeve, ekspertët e kompanisë italiane theksuan se marzhi i gabimit në të dyja sondazhet e djeshme është 2.5 për qind.

Shifrat

Sa u përket votave si parti, nga e majta, PS-ja ka 48.1 për qind të votave, LSI-ja ka 5.7 për qind. Kurse partitë e djathta konkretisht, PD-ja ka 39 për qind, PDIU-ja ka 1.2 për qind, PR-ja 1.1 për qind. FRD-ja merr 2.5 për qind.