Sondazhi: E majta 48%, e djathta 43%

IPR Marketing ka prezantuar sondazhin e dytë, të realizuar për Ora News. Në sondazhin e dytë të IPR Marketing u intervistuan 1002 persona në rang kombëtar të ndarë në mënyrë proporcionale në qarqe sipas popullsisë përkatëse dhe në të njëjtën mënyrë edhe 1000 persona vetëm në qarkun e Tiranës. Janë pyetur 565 persona në zonat urbane dhe 437 persona në zonat rurale. Marzhi i gabimit është 2.5 përqind. Intervistat janë kryer me telefon, 70 përqind me celularë dhe 30 përqind me telefona fiks. Por të pranishmit në studio kanë ngritur pikëpyetje për këtë mënyrë sondazhi, duke argumentuar se përmes telefonit shqiptarët mund të kenë frikë të thonë bindjet e tyre politike pasi druhen se numri i tyre telefonik do përdoret për pushim nga puna apo reagime të tjera.

Përfaqësuesi i IPR, Antonio Notte tha se ata janë prezantuar si IPR Marketing në telefon dhe jo si Ora News. Menjëherë përgjigja e parë ka ngjallur shumë debat, për shkak se të pyeturit kanë deklaruar se tyre u intereson më së shumti programi i një partie dhe shumë pak interesohen për liderin e koalicionit apo për vetë koalicionin. Ashtu edhe si në sondazhin e parë, shqiptarët sërish thonë se problemi kryesor që kanë është papunësia, me 74 përqind të të pyeturve që e shohin si problemin kryesor. Më pas vjen kriza ekonomike dhe vijon ligjshmëria dhe lufta ndaj korrupsionit. Në një tjetër pyetje, më shumë shqiptarë thonë se po e ndjekin fushatën, por pa interes. Më shumë shqiptarë mendojnë se fushatën elektorale e drejton më mirë dhe në mënyrë më bindëse Edi Rama. Por sërish janë plot 38 përqind që nuk e dinë ende. Shumica dërrmuese e të pyeturve janë kundër propozimit të kryeministrit Sali Berisha për të përfshirë në votime edhe ata që janë 16- vjeçarë. Sa i përket Tiranës, koalicioni i majtë merr 49.5 përqind të votave, kurse koalicioni i djathtë merr 45 përqind të votave. Të përkthyera në mandate janë 17 mandate për të majtën dhe 15 mandate për të djathtën. LSI merr plot 8 përqind. FRD nuk merr asnjë mandat. Sa i përket votës në rang kombëtar, koalicioni i majtë është ngritur me dy pikë duke arritur në 48 përqind nga 46 përqind që ishte dy javë më parë. Kurse koalicioni i djathtë ka pësuar një ulje të lehtë duke kaluar në 43.5 përqind nga 44 përqind që ishte më parë. PS dhe PD ndajnë rezultat të njëjtë, duke marrë nga 38 përqind. LSI ka pësuar rritje duke kapërcyer nga 5.5 përqind në 6.5 përqind. Por kanë pësuar rënie dy partitë që garojnë si të pavarura, Fryma e Re Demokratike dhe Aleanca Kuq e Zi. FRD ka 3.5 përqind kurse AK ka 4 përqind të votave. Rezultatet kanë shkaktuar tension në studio, pasi analisti Çim Peka tha se ky është një sondazh i paguar nga Lëvizja Socialiste për Integrim. Drejtuesja e emisionit, Ilva Tare, i kërkoi atij që të ruante seriozitetin dhe të mos bënte akuza. Por Peka u shpreh se është i bindur se këtë sondazh e ka paguar LSI.

Të pyetur se çfarë do të mendonin mbi të gjitha për të vendosur se si do të votojnë në zgjedhje përgjigja ka qenë:

39,4% Programin

20,3% Partinë

11,2% Për kandidatët në listat e partive

9,5% Për liderin e koalicionit

5,3% Për koalicionin

14,3% Nuk e di

Cilat janë çështjet që një parti duhet të merret kryesisht, në mënyrë që të marrë votën e qytetarëve:

Papunësia 74,6%

Kriza ekonomike 52,4%

Ligjshmëria dhe lufta kundër korrupsionit 36,9%

Integrimi në bashkimin europian 30,4%

Siguria dhe lufta kundër kriminalitetit 28,7%

Çështjet e të drejtave të grave 18,9%

Politikat rinore 15,6%

Politikat sociale 3,8%

Tjetër 1,8%

Nuk e di 1,5%

A po e ndiqni fushatë për zgjedhjet parlamentare të qershorit: 36,2% e të intervistuarve janë përgjigjur se po e ndjekin me shumë interes

45,9% po e ndjekin, por me pak interes

17,9% nuk po e ndjekin fare

Pyetja se kush po e drejton fushatën elektorale në mënyrë më bindëse dhe efikase ka marrë si përgjigje:

36,3% Edi Rama dhe PS

25% Sali Berisha dhe PD

38,7% Nuk e di

Një nga pyetjet e radhës ka qenë edhe në lidhje me 3 ligjet e integrimit ku të intervistuarit janë përgjigjur:

39,9% se ligjet duhen modifikuar përpara se të aprovohen

29,3% mendojnë se janë mirë kështu siç janë

30,8% janë përgjigjur “Nuk e di”

Të pyetur se çfarë mendimi keni për uljen e moshës për të votuar deri në 16 vjeç, shqiptarët i janë përgjigjur:

79,6% Kundër

18,2% Pro

“Nuk e di” i janë përgjigjur 2,3%

Pyetjes se nëse nënshtetasit shqiptarë jashtë kufijve duhet të votojnë në shtetin ku jetojnë apo duhet të kthehen për të votuar në Shqipëri, të intervistuarit i janë përgjigjur:

58,2% Duhet të votojnë në shtetin ku ata jetojnë.

34,2% duhet të kthehen në Shqipëri për të votuar

7,6% i janë përgjigjur nuk e di

Mandatet në Tiranë ndahen:

14 PS

14 PD

3 LSI

1 PDIU

Për qarkun e Tiranës pyetjes se kush i fiton zgjedhjet, përgjigja është:

Koalicioni i majtë 49,5%

Koalicioni i djathtë 45 %

PS 38%

PD 38%

LSI 8%

FRD 2%

AK 2,5%

Në rang kombëtar rezultati se kush i fiton zgjedhjet është:

PS 38%

LSI 6,5%

PSD 1%

PBDNJ 0,5%

G99 0,5%

PDS 0,5%

TJETER 0,1%.

PD 38%

PR 1%

PDIU 1%

PDK 0,5%

PAA 0,5%

LZHK 0,5%

PARTI TJETER 2%

FRD 3,5%

AK 4%

TJETER 1%

KOALICIONI I MAJTE 48%

KOALICIONI I DJATHTE 43,5%