Kosova në protestë: Eulex po na merr lirinë dhe çlirimtarët

Mijëra qytetarë nga mbarë Kosovë kanë dalë në protestë kundër arrestimit të disa ish- drejtuesve të UÇK, të cilët akuzohen nga EULEX për krime lufte. Në krye të protestës kanë qenë ish- komandantët e UÇK-së dhe familjarët e dëshmorëve. Kreu i Shoqatës së Familjeve të Dëshmorëve, Xhavit Jashari tha se lirinë e fituar me luftë nuk mund ta marrë askush me akuza e njollosje, siç po vepron EULEX. “Ne i themi EULEX-it se atë që e kemi fituar me luftë, duhet luftë për të na e marrë keq dhe assesi me akuza, njollosje dhe shpifje ndaj vlerave kulmor të kombit shqiptar”, tha Jashari. Në emër të organizatorëve të protestës, Jashari ka ftuar edhe presidenten Atifete Jahjaga, kryeparlamentarin Jakup Krasniqi dhe kryeministrin Hashim Thaçi që të rishikojnë mandatin ekzekutiv të EULEX-it. Protestuesit thanë se do vijojnë protestat deri në lirimin e të arrestuarve.

Ka përfunduar protesta e thirrur nga OVL e UÇK kundër veprimeve të EULEX-it ndaj disa ish-komandantëve të UÇK-së. Protesta ka përfunduar e qetë. Ata tashmë janë shpërndarë, me porosinë që sërish të bashkohen për të mbrojtur, siç janë shprehur oratorët që iu drejtuan  protestuesve, luftën dhe lirinë e Kosovës. Ndërkohë, protestuesve u është drejtuar edhe këngëtarja Leonora Jakupi me një këngë kushtuar çlirimtarëve. Mijëra qytetarë kanë protestuar në mbrojtje të ushtarëve të UÇK-së që po hetohen nga EULEX-in për dyshime për kryerje të krimeve të luftës. Ndërsa organizatorët kanë paralajmëruar protesta dhe veprime tjera për mbrojtjen e luftës dhe ushtarëve të UÇK-së. “Unë e vrava Bullatovicin” dhe “Mos ma gjykoni lirinë”, kanë qenë disa prej pankartave të protestuesve. Ata vazhdimisht kanë brohoritur "Krejt Kosova UÇK". Kryetari i shoqatës së familjeve të dëshmorëve të UÇK-së, Xhavit Jashari ka thënë se nuk po protestohet kundër faktorit ndërkombëtar por ndaj faktorit EULEX që po e njollos luftën e UÇK-së. Ai ka kërkuar nga krerët e shtetit që ta shqyrtojnë mandatin e Misionit për Sundimin e Ligjit. “E ftojmë presidenten Jahjaga, kryeministrin Thaçi dhe kryeparlamentarin Krasniqi që ta shqyrtojnë mandatin e EULEX-it menjëherë", ka thënë Jashari duke shtuar se nëse situata destabilizohet, përgjegjësinë do ta marrë EULEX-i dhe institucionet e Kosovës. Simboli i rezistencës kosovare, Adem Demaçi  i cili iu drejtuar me një fjalë protestuese i ka bërë thirrje EULEX-it që të kenë kujdes se kënd e cilësojnë si kriminelë. “Ne kemi pritur nga EULEX që të na ndihmojë për zgjidhjen e disa çështjeve të mbetura, për ndriçimin e krimeve të kryera nga Serbia. Por ne nuk kemi pritur nga ata që çlirimtarët t’i bëjnë kriminelë të luftës. Kriminelë nuk janë çlirimtarët, ne luftuam për lirinë tonë. Rroftë Ushtria Çlirimtare e Kosovës”, ka thënë Demaçi. Mbrojtja e grupit të Drenicës, ka parashtruar ankesë në gjykatën themelore, lidhur me masën e arrestit të caktuar për 6 të arrestuarit. “Ne kemi parashtruar ankesën tonë për këtë masë dhe presim që gjatë 48 orëve të ardhshme të marrim një përgjigje”, ka thënë avokati i ish-komandantit Sylejman Selimi.

Në orën e paralajmëruar në Parkingun e Pallatit të Rinisë, në kryeqytet, u mblodhën mijëra protestues në shenjë kundërshtimi të veprimeve të EULEX-it ndaj ish-komandantëve të UÇK-së. Protestës së thirrur nga shoqatat e dala nga lufta e UÇK-së i janë bashkuar edhe shumë qytetarë. Vërehen sidomos të rinj. Shoqatat e veteranëve të UÇK-së kanë shfaqur kundërshtimet ndaj veprimeve të EULEX-it në rastin e arrestimit të Grupit të Drenicës, njësoj si më parë edhe ndaj rastit Kleçka me kryeprotogonist Fatmir Limajn.

Siç tash më dihet, gjyqtari i procedurës paraprake ka shqiptuar masën e arrestit shtëpiak prej 30 ditësh për Grupin e Drenicës, të cilët akuzohen për maltretime ndaj civilëve në burgun e Likocit gjatë qershorit të vitit 1998. Ndër të akuzuar janë Ish-komandanti i Shtabit të Përgjithshëm të UÇK-së, Sylejman Selimi, ish-komandanti i Zonës Operative të Drenicës, Sami Lushtaku, ish- komandanti i Brigadës 111, Jahir Demaku, si dhe Zeqir Demaku, Sahit Jashari, Avni Zabeli dhe Hysni Thaçi.  Avokatët e të akuzuarve kanë paralajmëruar që sot ankesë ndaj vendimit të gjykatës. Ata akuzat ndaj këtij grupi i kanë cilësuar të motivuara politikisht dhe të paqëndrueshme juridikisht.