Eshte rradha e Lazaratit

Ora e Lazaratit po troket. Lazarati i Sali Berishës, i njohur ndryshe si Kolumbia e paprekshme e Evropës, duket se po numëron orët e fundit. Ndërsa opozita shqiptare ka kthyer drogën në kauzë dhe në krye të aksionit politik, shumica në pushtet po përgatitet për një betejë finale me oazin e hashashit të Evropës, Lazaratin, i cili prej 24 vitesh ka sfiduar shtetin ligjor, prokurorinë, policinë, Kushtetutën dhe çdo qeveri. Organet ligjzbatuese në Shqipëri, në bashkëpunim me partnerët ndërkombëtar, kanë përgatitur tashmë një plan për “pushtimin” e Lazaratit, i cili që nga zgjedhjet e 23 Qershorit, duket se ka humbur imunitetin politik. Sipas burimeve, bëhet fjalë për një bashkëpunim midis Ministrisë së Brendshme, Policisë së Shtetit, Forcave të Armatosura, Shërbimit Informativ Shtetëror, misionit PAMECA, ICITAP dhe Shteteve të Bashkuara të Amerikës. Fillimisht, shumica qeverisëse e dalë nga zgjedhjet e 23 Qershorit, ka shprehur vullnetin politike për t’i dhënë fund paligjshmërisë dhe turpit kombëtar në Lazarat. Mbi bazën e këtij vullneti, prokuroria dhe policia kanë ngritur një grup pune të nivelit të lartë. “Në kuadër të strategjisë dhe planit të veprimit në luftën kundër kultivimit dhe trafikimit të lëndëve narkotike, është ngritur para pak kohësh një grup pune i nivelit të lartë ndërmjet Policisë së Shtetit dhe Prokurorisë, që kam shumë shpresë se do japë rezultatet e duhura, procedime efektive dhe dënime maksimale për të gjithë ata që organizojnë dhe drejtojnë sipërmarrjen e kultivimit dhe trafikimit të lëndëve narkotike”, ka deklaruar ministri i Brendshëm, Sajmir Tahiri. Por, nisur nga përvoja e tentativës së fundit, ku lazaratasit zmbrapsën më armë policinë, plani aktual parashikon edhe angazhimin e elitës së ushtrisë, për të vendosur shtetin ligjor në Lazarat. Sipas burimeve, për vendosjen e autoritetit të shtetit në Lazarat, do të mobilizohen komandot më të dalluara shqiptare, që kanë marrë pjesë në misione në Afganistan, Irak dhe Bosnje. Ndonëse nuk dihet ende, për numrin e ushtarakëve që do të angazhohen në këtë aksion historik, burime pranë Ministrisë së Brendshme dhe Ministrisë së Mbrojtjes, kanë konfirmuar vendimin për të hyrë në fshatin e drogës, ku do të asgjësohen të gjitha bimët narkotike.   

Policia rrit prezencën

 Javët e fundit, Policia e Shtetit, ka rritur prezencën në Lazarat. Tre drejtuesit më të lartë të policisë kanë vizituar këto ditë fshatin e drogës. Po ashtu, disa drejtues policie kanë luajtur futboll me lazaratasit në fshat. Këto lëvizje u interpretuan si dështim dhe poshtërim i policisë, por dy vizitat duket se kanë të bëjnë me planin për të ndërhyrë në Lazarat.  

 Paralajmërimi i Didit   

Drejtori i Përgjithshëm i Policisë së Shtetit, Artan Didi, ka paralajmëruar planin për të ndërhyrë në Lazarat. “Në këtë sfond Lazarati është i përmendur dhe i trajtuar; policia shqiptare është duke bërë plane, të cilat janë në zhvillim e sipër në zonën e Gjirokastrës dhe të tjera në Shqipëri. Këtë e tregojnë rezultatet e larta në bllokimin e lëndëve narkotike dhe në Lazarat po merren masa për të kufizuar, por më pas do shqyrtojmë për hapa të mëtejshëm”, tha ai. Vetëm disa ditë më parë, Drejtori i Përgjithshëm i Policisë së Shtetit, Artan Didi, ka zbarkuar në Lazarat. 

Vërshimet në Serbi, ndihma edhe nga EULEX

Nga nesër popullata në Serbi e rrezikuar nga vërshimet do të ketë edhe ndihmën e EULEX’it.

Siç njofton B92, një helikopter me ndihma do të ateroj nesër në aeroportin e Surçinit në Beograd.

Sipas zëdhënëses së EULEX’it, Dragana Nikoliq Solomon, ndihma humanitare për popullatën serbe të rrezikuar nëpërmjet kamionëve do të nisen po nesër nga Kosova.

Sipas mediave serbe nga zonat e rrezikuara deri më tani janë larguar rreth 17 mijë persona.

Data: 17 Maj 2014 23:51

Edhe Ardian Fullani ne Prokurori

Shkon në prokurori stafi i Guvernatorit të Bankës së Shqipërisë, Ardian Fullani, i njohur si zyrtari më shpërdorues, i korruptuar dhe i babëzitur në Shqipëri. Është një detyrim ligjor që duhet të kishte ndodhur prej vitesh, por Ardian Fullani u la të livadhiste në paratë e shqiptarëve. Më në fund stafi i Bankës së Shqipërisë, ka shkuar në prokurori, por jo Guvernatori i Bankës, Ardian Fullani, orkestruesi kryesor i të gjithë serisë së aferave marramendëse financiare që janë konsumuar në Bankën e Shqipërisë. Gjithsesi një procedim penale ka nisur për stafin dhe bashkëpunëtorët e Ardian Fullanit, të cilët po ndiqen në gjendje të lirë. Ndaj këtyre punonjësve rëndon akuza e shpërdorimit të detyrës, për “Shkelje të barazisë në tendera”. Nga ana tjetër, hidhen dyshime për shkelje në tenderin për prishjen e ish-Hotel Dajtit. Mësohet se punonjësit kanë abuzuar me qiratë që Banka e Shqipërisë i paguan subjekteve private. Policia ka bërë me dije se administrata ka zvarritur në mënyrë të qëllimtë dhe abuzive rikonstruksionin e godinës së bankës.   

Skandali me “Hotel Dajtin”

   Ardian Fullani i ka blerë Sali Berishës me paratë e shqiptarëve “Hotel Dajtin”, për të shlyer borxhet e qeverisë. Gjithçka është luajtur me paratë e qytetarëve shqiptarë, para të cilat kanë shkuar për luksin e Guvernatorit dhe në xhepat e klientelës së Sali Berishës, sot i përmbysur nga pushteti. Sot gërmadha e “Hotel Dajtit” është vetëm një nga dëshmitë e pazareve mes Ardian Fullanit dhe Sali Berishës, ku Banka e Shqipërisë, në shkelje flagrante të ligjit, ka financuar qeverinë e kaluar. Fullani është bashkëpërgjegjës me Sali Berishën dhe Ridvan Boden për shkretimin e financave të shtetit shqiptar, përmes manovrave të ndryshme financiare. Fullani ka tejkaluar limitet e kreditimit, duke shkelur nenin 30 të ligjit “Për Bankën e Shqipërisë”. Në kohën me të vështirë për financat publike dhe Sali Berishën, Guvernatori Fullani u kthye në “garant” të shpëtimit të tyre. Fullani pranoi të blinte Hotel Dajtin, pronë shtetërore, për një shifër kolosale prej 30 milionë eurosh, që kaloi në buxhet, ndërkohë që ende nuk ka nisur asnjë punim ristrukturimi në këtë objekt. Ndërkohë, qeveria, me vendim të veçantë ia shiti ndërtesën Bankës së Shqipërisë, për 30 milionë euro. “Hotel Dajtit” sot është katandisur dhe degraduar, siç edhe e tregojnë fotografitë, ndërsa partë shkuan për të ushqyer afera të tjera korruptive të qeverisë së kaluar.   

Pse nuk rikonstruktohen “Hotel Dajti”?  

 Ka një arsye të fortë se pse nuk rikonstruktohen “Hotel Dajti” dhe pse zvarritet rikonstruksioni i godinës së Bankës së Shqipërisë. Duke mbajtur peng këto dy godina, Fullani paguan çdo vit 6 milionë USD kontrata qiraje. Duke përdorur si alibi çështjen e rikonstruksionit të bankës, Fullani prej disa vitesh ka marrë me qira zyra, objekte dhe godina. Duket e pabesueshme, por sipas të dhënave nga bilancet e vetë bankës mësohet se guvernatori Fullani akordon 6 milionë dollarë në vit për shpenzime për qira zyrash. Skandali është i paprecedentë, ndërsa prej disa vitesh godina e Bankës së Shqipërisë vijon të jetë e rrethuar formalisht nën pretekstin e rikonstruksionit. Kontrata për rikonstruksionin e bankës përbëjnë një histori të mirëfilltë abuzimi, pasi janë zgjatur, ndryshuar dhe manipuluar në funksion të kontratave të qirasë. Gjithçka është konstatuar dhe zbardhur edhe nga institucioni më i lartë i kontrollit financiar, KLSH. Por, edhe pse kostoja e abuzimeve të Ardian Fullanit po fryhet me shpejtësi në kurriz të taksapaguesve shqiptarë, ende nuk ka asnjë sinjal apo paralajmërim nga ana e Kuvendit të Shqipërisë për të marrë masa.  /sot

Berlusconi, ”mik” i Putinit, kërkon mos izolimin e Rusisë

BERLIN, 17 maj /ATSH-AFP/ – Ish-kryeministri italian, Silvio Berlusconi korkoi mos izolimin e Rusisë në krizën ukrainase duke përshëndetur miqësinë me presidentin rus, Vladimir Putin, në një intervistë për një të përjavshme gjermane.

“Do të ishte për të ardhur keq një izolim tjetër i Rusisë, pasi pasoja do të ishte që Rusia do t’i bashkohej sërish Azisë”, theksoi Berluskoni, në një intervistë për të përjavshmen gjermane ”Die Welt am Sonntag” duke iu referuar krizës ukrainase.
I kënaqur për marrëdhënien e tij me drejtuesin rus ai u shpreh, ”Putin dhe unë jemi të lidhur nga një miqësi personale dhe e vërtetë. Disa herë, na ka ndodhur në fundjavat e përbashkëta të mos flasim vetëm për politikë”.
”Ne flasim për gjithçka. Për historinë (…). Nga arkitektura, veprat e artit italian në Shën Petersburg. Ky qytet është ndërtuar me ndihmën e arkitektëve të shumtë italianë”, shtoi ai.
“Fëmijët e tij më kanë bërë vizitë gjatë pushimeve, bashkëshortja e tij ka vizituar Italinë. Kam një marrëdhënie solide me të. E vlerësoj shumë”, shtoi ai.
Këto ditët e fundit, në kuadër të fushatës evropiane, Berlusconi kishte konfirmuar se kriza ukrainase rrezikon të provokojë një rikthim në Luftën e Ftohtë dhe se sanksionet ekonomike kundër Rusisë do të çojnë në drejtimin më të keq dhe mund të shkaktojnë një divorc mes Moskës dhe botës perëndimore./

Erdogan: Po, e godita me grusht një qytetar

Qeveria e Turqisë e ka pranuar përplasjen fizike ndërmjet Kryeministrit Erdogan dhe këshilltarit të tij, Jusuf Jerkel, dhe protestuesve, gjatë vizitës në qytetin Soma.

Në një deklaratë për media thuhet se veprimi i Kryeministrit ishte nji reagim i momentit.

Pamjet tregojnë se pasi hyn në një supermarket, për të shmangur turmën e cila e ka akuzuar si përgjegjës për tragjedinë në minierë, Erdogan ka goditur me grusht një protestues.

E përditshmja turke “Hyrriet” shkruan se personi që u konfrontu me Kryeministrin, ishte Taner Kuruca, i cili u shpreh për mediat turke se nuk kishte lidhje me protestën.

Sipas tij, kur truprojat nisën të shtynin turmën, Erdogan u irritua dhe filloi të qëllojë me grusht në mënyrë të pakontrolluar.

Edhe këshilltari i kryeministrit, Jusuf Jerkel, ishte përfshirë në një konfrontim fizik.

Në deklaratë thuhet se edhe ai justifikohet me faktin se nuk arriti të ruaj qetësinë, si pasojë e fyerjeve dhe sulmeve të vazhdueshme./ekspres

Ministri i Drejtesise urdheron shkarkimin e gjyqtares se çeshtjes "Gjin Gjoni"

Ministri i Drejtësisë Nasip Naço ka urdhëruar ditën e sotme nisjen e procedurave për shkarkimin e gjyqtares Miranda Çekrezi. Sipas ministrit gjyqtarja Çekrezi ka shkelur hapur ligjin.

Ai thekson se gjyqtarja s’duhet të gjykonte çështjen për pezullimin e Gjin Gjonit, pasi ky i fundit ka gjykuar Çekrezin në vitin 2011. Ministri Naço është shprehur se gjyqtarja Çekrezi ka mbetur peng e ndereve të vjetra. Ai ka theksuar se Ministria e Drejtësisë është e vendosur të zbatojë ligjin ndaj kujtdo.

Qeveria reagon per drogen e kapur ne Gjermani

Partia Socialiste ka reaguar lidhur me sasinë e drogës të kapur një ditë më parë në Gjermani, duke deklaruar se bëhej fjalë për një operacion të përbashkët të policisë gjermane e shqiptare.

“Bëhet fjalë për një hetim të policisë gjermane të nisur në tetor, në bashkëpunim me policinë shqiptare. Aktualisht po hetohet për trafik droge edhe në të kaluarën”, deklaroi zv.ministrja e punëve të brendshme, Elona Gjebrea.

Ajo hodhi poshtë pretendimet e opozitës, se shtetet fqinje dhe ato të tjera evropiane janë të shqetësuara nga narkotrafiku me prejardhje nga Shqipëria.

“Vendet fqinje, por dhe të tjera, jo vetëm që nuk janë të shqetësuara, por janë të inkurajuara nga angazhimi maksimal dhe rezultatet e arritura nga policia shqiptare”, u shpreh Gjebrea.

Ajo citoi statistikat e policive partnere, që sipas saj konfirmojnë angazhimin e qeverisë shqiptare dhe tregojnë se droga nga Shqipëria nuk është shumëfishuar.

“Policia e Shtetit është e vendosur të luftojë pa kompromis trafikimin e çdo lloj droge, duke bashkëpunuar me të gjitha agjencitë ligj-zbatuese në vend dhe jashtë vendit”, shtoi Gjebrea./shqip