Ikja e dytë e Sali Berishës

-Nga Gjergj Zefi-

Hera e fundit që Berisha iku nga pushteti ishte tragjike .Ai la pas një shkretirë .Një bilanc biblik. 3000 vetë i la të vrarë dhe 18 mijë të plagosur .Cdo javë hapeshin nga dhjetë varre në Babicë të Vlorës dhe çdo ditë niseshin dhjetëra të plagosur  drejt  Janinës , një qytet grek  në kufi të Shqipërisë . Ekonomia e qytetarëve dhe e shtetit humbi rreth 2 miliardë dollarë ; humbi mijëra biznese ; e ktheu vendin në stadin e ndihmës emergjente dhe të pakove me ushqim për një popull të uritur , shkatrroi të gjitha institucionet e shtetit ; e la vendin pa ushtri ; pa polici ; me 11 ushtri të huaja që mbronin me armë paqen mes qytetarëve të vendit . Kjo ishte hera e parë e largimit të Berishës .

Hera e dytë , që do të jetë  edhe hera e fundit , e që do të ndodhë vetëm pas 45 ditëve sërish do të jetë e vështirë . Po të jetë për Berishën , ai do qe kjo hera e dytë të jetë edhe më e tmerrshme. Shkaku i tmerrit të largimit të dytë , qëndron pikrisht në faktin se kjo është hera e fundit. Dhe shkaku më i thellë është se vetë Berisha e kupton se kjo është hera e fundit . E Berisha i perket asaj rrace politikanësh që ikin duke thënë : Pas meje , SHKATRRIMI. Pyetja  që shtrohet është :C’farë duhet bërë?

“Bomba” Berisha duhet të çmontohet me gjakftohtësi

Ndersa Berisha iku herën e parë pa nxjerrë asnjë mësim (përderisa po i përsërit veprimet e para) qytetarët janë larguar nga ajo tragjedi me një eksperiencë kolosale. Pjesë e kësaj eksperience janë edhe ngjarjet e tmerrshme të ndodhur në këtë vend gjatë sundimit të dytë të Berishës siç ishin masakra e Gërdecit dhe ajo e 21 Janarit. Që në ditën e parë të ardhjes së tij qytetarët fiiluan ta shohin Berishën si një rrezik për paqen dhe stabilitetin . Ata tashmë e dinë se duhet të kenë “kujdes me djallin” , të mos e provokojnë atë . Nuk ka nevojë për demonstrime në rrugë , për përballje me të , edhe pse kupa është mbushur … Ata presin me qetësi zgjedhjet si qytetarë të vërtetë dhe aristokratë .

Edhe politika kësaj here është më qytetare. Ajo po tregohet shumë e kujdesshme që të mos bie pre e provokimeve të Berishës . Ajo e di tashmë  se më e rëndësishme se sa fitorja e zgjedhjeve është menaxhimi i Berishës në ikje . Të gjithë tashmë e njohin rrezikun që vjen prej tij … E bashkë me politikën , me opozitën edhe qytetarët janë më të përgatitur tani që ta bëjnë me kujdes punën e tyre për çmontimin me kujdes të regjimit të dhunshëm të Berishës … Herën e parë njerëzit e kërkuan të keqen edhe tek njëri-tjetri , ndërsa këtë rradhë do ta kërkojnë drejtpërdrejt tek kryeministri . I fokusuar si rreziku i vetëm i paqes së shoqërisë , ky do të jetë krejtësisht nën kontroll dhe njëkohsisht qesharak kur të mbyllet në shtëpinë e tij.

Perëndimi i ka ngritur antenat e vëmendjes

Veç opozitës dhe qytetarëve , edhe opinioni ndërkombëtar është më i vëmendshëm ndaj Sali Berishës . Apele të njëpasnjëshme dhe me seriozitetin e duhur i adresohen çdo ditë kryeministrit nga kancelaritë përëndimore . Principet e demokracisë nuk përputhen aspak me sjelljet autoritariste të kryeministrit të Shqipërisë. Për kancelaritë Berisha është një realitet i hidhur , por i njohur. Ata janë shumë të vemendshëm ndaj tij sepse nuk duan që t’i shohin sërish diplomatët e tyre tek ngjiten në helicopter me litar në stadiumin “Qemal Stafa” si ne vitin ’97. Perëndimi e ndjen edhe frikën e tensioneve në rajon që vijnë nga sjelljet e Berishës. Rasti me Luginën e Preshevës apo edhe me pasaportat për Kosovarët ishin flagrante. Tërheqja e veshit nga përëndimi bënë që Berisha të ulet në gjunjë e të tërhiqet nga deklaratat e tij. Ditët e fundit ai po përpiqet ta shesë veten si “paqësor” apo si “shërbëtor i përvuajtur” i përëndimit . Mirëpo pamja prej qingji nuk është pamja reale e Berishës në rajon. Këtë e kuptojnë mirë politikanët e përëndimit. Prandaj serioziteti ka përfshirë antenat e vëmendjes.

Naiviteti , një kamardare shpëtimi për kohë të vështira.

Sot në filozofinë bashkohore , naiviteti njihet si një magji shpëtimtare per kohë të vështira. Në fakt shumica e qytetarëve po mbulohen me një vello të këndshme naiviteti. E shikojnë misionarin e Berishës që u kalon shkallëve të pallatit , dhe bëjnë sikur nuk e shohin. I shikojnë njerëzit që shkaktuan tragjedinë e vitit 1997 dhe bëjnë sikur nuk i shikojnë . I shohin qytetarët e Kosovës (mbështetës të Berishës) që përpiqen të nxjerrin një dokument votimi dhe nuk thonë se këto janë kosovarë pasi kuptojnë se edhe kështu Berisha do ta keqpërdorë Kosovën.Berisha bën të gjitha përpjekjet që të provokojë mendjen  dhe moralin e njerzve. Tërë qëllimi i tij është që të ngrejë tension , sepse vetëm në luftë dhe në tension ai jeton mirë. Ka vënë në përdorim edhe një industri banale gazetarësh dhe mediash , me qëllim që provokimin ta dërgojë përnatë deri në shtëpitë e qytetarëve . mirëpo edhe kjo taktikë është kuptuar mirë . Qytetarët kanë mësuar nga tragjedia e parë , Berisha jo. Mund të ndodhë që hera e dytë të jetë shumë e rëndë , sepse Berisha e di se nuk mund të provojë më pushtet. Me herën e dytë do që t’i marrë të gjitha me vete.