Rruga e Serbise per ne BE kalon nga Prishtina

Beograd, 29 prill - Për Serbinë çdo gjë nga Bashkimi Evropian është e pranueshme, përpos kërkesës për njohje të Kosovës. “Mantra” serbe i është rikujtuar edhe njëherë Brukselit gjatë vizitës që e zhvilloi të hënën në Beograd, shefja për Politikë të Jashtme e BE-së, Catherine Ashton.

Mirëpo, presionet e BE-së, sipas profesorit të Shkencave Politike në Beograd, Vladimir Goati, do të vazhdojnë edhe ndaj qeverisë së re gjithmonë duke kërkuar qartësim të çështjeve me Kosovën.

“Realiteti është se pushtetarët gjithmonë janë nën presion prej BE-së. Daçiq dhe liderët e tjerë kanë vendosur një lloj të kompromisit me Kosovën, mirëpo ata duhet të jenë të saktë me Kosovën, që të përfundojnë çështjet që i kanë”, i deklaroi “Zërit” përmes telefonit, profesori Goati.

Ky i fundit beson fuqishëm që Kosova do të jetë çmimi i Serbisë për të hyrë në Bashkimin Evropian.

“Absolutisht që ka presion ndaj të dyja palëve (edhe ndaj Kosovës) prej Brukselit. Kosova do të jetë çmimi për Serbinë që të hyjë në BE”, vlerëson më tej Goati.

Ndërkaq, vazhdimi i forcimit të marrëdhënieve me perëndimin janë fokus edhe i qeverisë së re serbe, vlerëson Ljubomir Madzar, ligjërues në Institutin “Petar Kariç” në Universitetin “Alfa” të Beogradit. Mirëpo për të, kjo nuk është diçka e re pasi politika në Beograd i ka nisur ndryshimet para një viti e gjysmë.

“Çfarëdo që ai (Vuçiq) ka thënë këtyre ditëve është vazhdim i politikës që e ka zbatuar Beogradi deri më tash. Politika e qeverisë në Beograd ka ndryshuar shumë me Kosovën, duke nisur me dialogun, konkludimin e marrëveshjeve të Brukselit, si dhe janë pajtuar në shumë çështje të tjera, krejt ndryshe nga pritjet. Ndryshimet e politikave drejt Kosovës kanë filluar para një viti e gjysmë”, tha përmes telefonit nga Beogradi, Ljubomir Madzar.

Njohësit e politikave të Serbisë megjithatë janë të bindur se mosndryshimi i politikës së Beogradit ndaj Kosovës ka të bëjë edhe me një fakt shumë të rëndësishëm, me ekonominë.

Kjo mbështetet edhe nga fakti se në fjalimin katërorësh që kryeministri, Aleksandar Vuçiq, e mbajti para parlamentit serb, të dielën, kur e bëri prezantimin e qeverisë së re, Kosovën e përmendi shumë pak.

“Arsyeja kryesore pse kryeministri Vuçiq foli shumë pak për Kosovën ka të bëjë shumë edhe me faktin se problemet e brendshme janë shumë më të mëdha. Në këtë moment, qeveria shumë më tepër është në hall me situatën e rëndë financiare të Serbisë”, vlerëson Madzar.

Një person që është tërësisht e bindur në suksesin e kryeministrit serb është shefja për Politikë të Jashtme e BE-së, Catherine Ashton. Kjo e fundit beson aq shumë në Vuçiqin saqë nuk e sheh të pamundshme që Serbia të përfundojë negociatat me BE-në deri në vitin 2018. Nëse kjo do të arrihet, do të ishte koha rekord e përfundimit të negociatave për anëtarësim në BE-në, duke marrë parasysh edhe reformat e vështira që pritet t’i ndërmarrë Serbia.

"Nëse do të isha në vendin tuaj, nuk do të dyshoja në kapacitetin e këtij njeriu, që të thyejë të gjitha rekordet”, është përgjigjur Ashton, derisa është kthyer me shikim nga kryeministri serb, Vuçiq.